داخلين على سنة جديدة، وما داخلين فاضيين… داخلين بذاكرة تقيلة، بتعب الحـ ـرب، وبأيام فقد وخوف ما كانت سهلة على زول. الحـ ـرب ما بس كسّرت بيوت وشوارع، كسّرت جوانا حاجات كتيرة: أمان، طمأنينة، وثقة في بكرة. عشان كدا استقبال السنة الجديدة ما مفروض يكون بالزينة والكلام السمح بس، لكن بمحاولة صادقة إننا ننضّف دواخلنا زي ما بننضّف بيوتنا قبل العيد؛ نشيل الغبن، نكنس الحزن المتراكم، ونفتح شباك للهواء يدخل. قالوا «ما بنقدر نغيّر الريح، لكن نقدر نعدّل الشراع»، ودا بالضبط المطلوب مننا: ما ننكر الوجع، لكن ما نخليه يتحكم فينا. السنة الفاتت علّمتنا إن النجاة نفسها إنجاز، وإن الاستمرار قوة، وإنو الزول البيصحى كل يوم ولسه بحاول، دا شجاع حتى لو ما حاسس بده. داخلين سنة جديدة وعايزين نكون أهدى، أرحم على نفسنا، أقل قسوة في الحكم على ذاتنا وعلى الناس. نقلل الضجيج، نختار شنو نسمع وشنو نطنّشو، ونقرب من الناس البيدونا أمان ولو بالكلام. ما دايرين وعود كبيرة، دايرين نية صافية: نعيش يومنا بيومه، نداوي آثار الحـ ـرب جوانا حبة حبة، ونصدق إنو «بعد العسر يسر» ما مجرد آية محفوظة، بل وعد حقيقي مهما اتأخر. السنة الجديدة ما وعدت زول بحاجة، لكن نحن ممكن نوعد نفسنا إننا ما نستسلم، وإننا نخلي في القلب مساحة للنور، حتى لو كان صغير.
